ಬೆಂಗಳೂರು:ಜುಲೈ-4:(www.justkannada.in) ಬಾಟಲ್ ಕ್ಯಾಪ್ ಚಾಲೆಂಜ್ ಎಂಬ ವಿಶಿಷ್ಠ ಸವಾಲೊಂದು ಈಗ ಸಾಮಾಜಿಕ ಜಾಲತಾಣಗಲ್ಲಿ ಭಾರೀ ಗಮನಸೆಳೆಯುತ್ತಿದೆ. ಹಾಲಿವುಡ್ ನಟನಿಂದ ಆರಂಭವಾದ ಈ ಹೊಸ ಚಾಲೆಂಜ್ ಈಗ ಬಾಲಿವುಡ್, ಟಾಲಿವುಡ್, ಸ್ಯಾಂಡಲ್ ವುಡ್ ಹಾಗೂ ಸಾಮಾನ್ಯ ಜನರಿಂದ ಕೂಡ ಗಮನಸೆಳೆಯುತ್ತಿರುವುದು ವಿಶೇಷ.
ಹಾಲಿವುಡ್ ನಟ ಜಾಸನ್ ಸ್ಟಾತಮ್ರಿಂದ ಸ್ಫೂರ್ತಿಗೊಂಡು ಬಾಲಿವುಡ್ ಆ್ಯಕ್ಷನ್ ಹೀರೋ ಅಕ್ಷಯ್ ಕುಮಾರ್, ಈ ಬಾಟಲ್ ಕ್ಯಾಪ್ ಚಾಲೆಂಜ್ ಅನ್ನು ಸ್ವೀಕರಿಸಿ, ವಿಡಿಯೋ ಮಾಡಿ ತಮ್ಮ ಇನ್ಸ್ಟಾಗ್ರಾಂ ಖಾತೆಯಲ್ಲಿ ಶೇರ್ ಮಾಡಿಕೊಂಡಿದ್ದಾರೆ. ಬಲಿಷ್ಠ ಭಾರತಕ್ಕಾಗಿ ಈ ಕೂಡಲೇ ನೀವೆಲ್ಲಾ ಈ ಚಾಲೆಂಜ್ ಅನ್ನು ಸ್ವೀಕರಿಸಿ ಎಂದು ಕರೆ ನೀಡಿರುವ ಅಕ್ಷಯ್, ಕಳುಹಿಸಿದ ವಿಡಿಯೋಗಳಲ್ಲಿ ತಮಗೆ ಇಷ್ಟ ಎನಿಸುವ ವಿಡಿಯೋಗಳನ್ನು ರೀಟ್ವೀಟ್ ಹಾಗೂ ರೀ ಪೋಸ್ಟ್ ಮಾಡುತ್ತೇನೆ ಎಂದೂ ಹೇಳಿದ್ದಾರೆ.
ಇದರ ಬೆನ್ನಲ್ಲೇ ಈ ಚಾಲೆಂಜ್ ನ್ನು ನಟ ಅರ್ಜುನ್ ಸರ್ಜಾ ಸ್ವೀಕರಿಸಿ, ಬಾಟಲ್ ಕ್ಯಾಪ್ ಚಾಲೆಂಜ್ ಕುರಿತು ವಿಡಿಯೋ ಒಂದನ್ನು ಮಾಡಿ ಅಕ್ಷಯ್ ಕುಮಾರ್ ಅವರಿಗೆ ಟ್ಯಾಗ್ ಮಾಡಿದ್ದಾರೆ. ಅಲ್ಲದೇ ಗೋಲ್ಡನ್ ಸ್ಟಾರ್ ಗಣೇಶ್ ಕೂಡ ಚಾಲೆಂಜ್ ಸ್ವೀಕರಿಸಿ, ವಿಡಿಯೋ ಪೋಸ್ಟ್ ಮಾಡಿದ್ದಾರೆ.
ಅಷ್ಟಕ್ಕೂ ಈ ಬಾಟಲ್ ಕ್ಯಾಪ್ ಚಾಲೆಂಜ್ ಅಂದರೆ ವ್ಯಕ್ತಿಯ ಮುಂದೆ ಒಂದು ಬಾಟಲ್ ಅನ್ನು ಇಟ್ಟು, ಒಂಟಿ ಕಾಲಿನಲ್ಲಿ ತಿರುಗಿ ಮತ್ತೊಂದು ಕಾಲಿನಲ್ಲಿ ಕಿಕ್ ಮಾಡಿ ಬಾಟಲಿಯ ಮುಚ್ಚಳವನ್ನು ಓಪನ್ ಮಾಡುವುದಾಗಿದೆ.
