ಬೆಂಗಳೂರು:ಮೇ-6:(www.justkannada.in) ವೀಕೆಂಡ್ ಮೋಜಿನ ಜತೆ ಕ್ರೇಜ್ ಗಾಗಿ ವೇಗವಾಗಿ ಬೈಕ್ ಓಡಿಸಿ ಡಿವೈಡರ್ ಗೆ ಹೋಗಿ ಡಿಕ್ಕಿಹೊಡೆದ ಪರಿಣಾಮ ಮೂವರು ಯುವಕರು ಧಾರುಣವಾಗಿ ಸಾವನ್ನಪ್ಪಿರುವ ಘಟನೆ ಬೆಂಗಳೂರಿನಲ್ಲಿ ನಡೆದಿದೆ.
ಬಸವೇಶ್ವರ ನಗರದ ಪುಣ್ಯ ಆಸ್ಪತ್ರೆ ಬಳಿ ತಡರಾತ್ರಿ ಈ ಭೀಕರ ಅಪಘಾತ ಸಂಭವಿಸಿದ್ದು, ಅಪಘಾತದಲ್ಲಿ ಮೂವರು ಇಂಜಿನಿಯರ್ಗಳು ಮೃತಪಟ್ಟಿದ್ದಾರೆ. ಶ್ರೀನಾಥ್, ಅನಿಲ್ ಮತ್ತು ಕಾರ್ತಿಕ್ ಮೃತಪಟ್ಟ ಯುವಕರು.
ಶ್ರೀನಾಥ್ ಹಾಗೂ ಕಾರ್ತಿಕ್ ಬೆಂಗಳೂರಿನಲ್ಲಿ ವಾಸವಿದ್ದರು. ರಜೆಯ ಮೇಲೆ ಬೆಂಗಳೂರಿಗೆ ಬಂದಿದ್ದ ಅನಿಲ್ ನನ್ನು ಭೇಟಿಯಾಗಲೆಂದು ಶ್ರೀನಾಥ್ ಮತ್ತು ಕಾರ್ತಿಕ್ ತೆರಳಿದ್ದರು. ರಾತ್ರಿ ಮೂವರೂ ಸ್ನೇಹಿತರು ಒಂದೇ ಬೈಕ್ನಲ್ಲಿ ತ್ರಿಬಲ್ ರೈಡಿಂಗ್ ತೆರಳುತ್ತಿದ್ದಾಗ, ವೇಗವಾಗಿ ತೆರಳುತ್ತಿದ್ದ ಬೈಕ್ ನಿಯಂತ್ರಣ ತಪ್ಪಿ ಡಿವೈಡರ್ಗೆ ಡಿಕ್ಕಿಹೊಡೆದಿದೆ. ಡಿಕ್ಕಿಯ ರಭಸಕ್ಕೆ ಯುವಕರ ತಲೆಗೆ ಗಂಭೀರ ಗಾಯವಾಗಿ ಮೂವರೂ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.
ಹೆಲ್ಮೆಟ್ ಧರಿಸಿದ್ದರೆ ತಲೆಯಭಾಗದಲ್ಲಿ ಗಂಭೀರವಾಗಿ ಏಟಾಗುತ್ತಿರಲಿಲ್ಲ. ಹೆಲ್ಮೆಟ್ಟಿಲ್ಲದ ಪರಿಣಾಮ ಮೂವರು ಸಾವನ್ನಪ್ಪಿದ್ದಾರೆ ಎನ್ನಲಾಗಿದೆ. ಮೃತಪಟ್ಟ ಕಾರ್ತಿಕ್ ಮದುವೆ ನವೆಂಬರ್ನಲ್ಲಿ ನಿಶ್ಚಯವಾಗಿತ್ತು ಮತ್ತು ಅನಿಲ್ ಅವರ ನಿಶ್ಚಿತಾರ್ಥ ಗುರುವಾರ ನಡೆಯಬೇಕಿತ್ತು.
