ಬೆಂಗಳೂರು:ಆ-13:ನಾಡಪ್ರಭು ಕೆಂಪೇಗೌಡ ಬಡಾವಣೆಯ ಚಲ್ಲಘಟ್ಟ ಬಳಿ ಮೆಟ್ರೋ ರೈಲು ನಿಲ್ದಾಣ ನಿರ್ವಣಕ್ಕೆ ಅಗತ್ಯವಾದ ಭೂಮಿ ನೀಡಲು ಬಿಡಿಎ ಪತ್ರ ಬರೆದಿದ್ದರೂ ಬಿಎಂಆರ್ಸಿಎಲ್ ಉತ್ತರ ನೀಡದಿರುವುದು ಹಲವು ಅನುಮಾನಗಳಿಗೆ ಕಾರಣವಾಗಿದೆ.
ಕೆಂಗೇರಿ ಹೋಬಳಿ ಚಲ್ಲಘಟ್ಟ ಗ್ರಾಮದ ಸರ್ವೆ ನಂ.21, 22, 23, 24 ಹಾಗೂ 28ರಲ್ಲಿ 12 ಎಕರೆ 13 ಗುಂಟೆ ಜಾಗವನ್ನು ಬಿಎಂಆರ್ಸಿಎಲ್ಗೆ ಹಸ್ತಾಂತರ ಮಾಡಲು ಬಿಡಿಎ ಸಿದ್ಧವಾಗಿದೆ. ಇದಕ್ಕಾಗಿ 142.30 ಕೋಟಿ ರೂ. ಪಾವತಿ ಮಾಡಿ ಜಮೀನು ಸ್ವಾಧೀನಕ್ಕೆ ಪಡೆಯಬೇಕು ಎಂದು ಬಿಎಂಆರ್ಸಿಎಲ್ ಮುಖ್ಯಸ್ಥರಿಗೆ ಬಿಡಿಎ ಹಿಂದಿನ ಆಯುಕ್ತೆ ಡಾ. ಮಂಜುಳಾ ಪತ್ರ ಬರೆದಿದ್ದರು.
ಪತ್ರ ಬರೆದು ಹಲವು ದಿನ ಗಳೇ ಕಳೆದರೂ ಬಿಎಂಆರ್ಸಿಎಲ್ ಪ್ರತಿಕ್ರಿಯೆ ನೀಡಿಲ್ಲ. ಹೀಗಾಗಿ ಚಲ್ಲಘಟ್ಟದ ಬಳಿ 2ನೇ ಹಂತದಲ್ಲಿ ಮೆಟ್ರೋ ರೈಲು ನಿಲ್ದಾಣ ನಿರ್ಮಾಣ ವಿಳಂಬವಾಗಲಿದೆ ಎಂದು ಮೂಲಗಳು ತಿಳಿಸಿವೆ.
ಅಧಿಕ ದರ: ಮೆಟ್ರೋ ರೈಲು ನಿಲ್ದಾಣಕ್ಕೆ ಬಿಡಿಎ ನೀಡುವ ಜಾಗದ ದರ ಅಧಿಕವಾಗಿರುವು ದರಿಂದ ಬಿಎಂಆರ್ಸಿಎಲ್ ಪ್ರತಿಕ್ರಿಯೆ ನೀಡಿಲ್ಲ ಎಂದು ಮೂಲಗಳು ತಿಳಿಸಿವೆ. ಬಿಡಿಎ ನೀಡುತ್ತಿರುವ ಜಾಗ ಅಭಿವೃದ್ಧಿ ಹೊಂದಿಲ್ಲ. ರೈತರಿಂದ ಪಡೆದ ಸ್ಥಿತಿಯಲ್ಲೇ ಬಿಎಂಆರ್ಸಿಎಲ್ಗೆ ನೀಡಲು ಮುಂದಾಗಿದೆ. ಅಲ್ಲದೆ ಪ್ರತಿ ಚದರ ಮೀಟರ್ಗೆ 28,500 ರೂ. ದರ ನಿಗದಿಪಡಿಸಿದೆ. ಇಷ್ಟು ಹಣ ಮೆಟ್ರೋ ರೈಲು ನಿಗಮಕ್ಕೆ ದುಬಾರಿಯಾಗಿ ಹೊರೆಯಾಗಲಿದೆ. ಹೀಗಾಗಿ ಜಾಗ ಖರೀದಿಗೆ ಬಿಎಂಆರ್ಸಿಎಲ್ ವಿಳಂಬ ಮಾಡುತ್ತಿದೆ ಎನ್ನಲಾಗಿದೆ.
ಹಣ ಪಾವತಿಯಾಗದೆ ಜಮೀನು ಹಸ್ತಾಂತರ ಇಲ್ಲ: ಬಿಎಂಆರ್ಸಿಎಲ್ ಹಣ ಪಾವತಿ ಮಾಡದೆ ಬಿಡಿಎ ಜಮೀನು ವರ್ಗಾಯಿಸುವುದಿಲ್ಲ. 2ನೇ ಹಂತದ ಮೆಟ್ರೋ ಕಾಮಗಾರಿಗೆ ಸರ್ಕಾರ ಅನುಮೋದನೆ ನೀಡಿ ಬಜೆಟ್ನಲ್ಲಿ ಹಣ ಕೂಡ ಮೀಸಲಿಟ್ಟಿದೆ. ಆದರೆ ಬಿಡಿಎ ಹಾಗೂ ಬಿಎಂಆರ್ಸಿಎಲ್ ನಡುವಿನ ಜಟಾಪಟಿಯಿಂದ ಚಲ್ಲಘಟ್ಟ ಮೆಟ್ರೋ ಕಾಮಗಾರಿ ವಿಳಂಬವಾಗುವ ಸಾಧ್ಯತೆ ಇದೆ.
ಭೂಮಿ ಕೋರಿದ್ದ ಬಿಎಂಆರ್ಸಿಎಲ್
ಬಿಎಂಆರ್ಸಿಎಲ್ 2ನೇ ಹಂತ ರೀಚ್ 2ನಲ್ಲಿ ಮೈಸೂರು ರಸ್ತೆಯ ಕೆಂಗೇರಿಯಿಂದ ಚಲ್ಲಘಟ್ಟದವರೆಗೆ ಮೆಟ್ರೋ ಮಾರ್ಗ ನಿರ್ವಣಕ್ಕೆ ಮುಂದಾಗಿದೆ. ಚಲ್ಲಘಟ್ಟದಲ್ಲಿ ಮೆಟ್ರೋ ನಿಲ್ದಾಣ ನಿರ್ವಣವಾಗಲಿದ್ದು, ಅಗತ್ಯವಾದ ಭೂಮಿ ನೀಡುವಂತೆ ಬಿಎಂಆರ್ಸಿಎಲ್ ಕೋರಿತ್ತು. ಬಿಡಿಎ ಆಡಳಿತ ಮಂಡಳಿ ಸಭೆಯಲ್ಲಿ ಚರ್ಚೆ ನಡೆದು ಜಾಗ ನೀಡಲು ಒಪ್ಪಿಗೆ ನೀಡಲಾಗಿತ್ತು.
ಚಲ್ಲಘಟ್ಟದಲ್ಲಿ ಮೆಟ್ರೋ ರೈಲು ನಿಲ್ದಾಣಕ್ಕೆ ಜಾಗ ಗುರುತಿಸಿ ದರ ನಿಗದಿ ಮಾಡಿದ್ದರೂ ಬಿಎಂಆರ್ಸಿಎಲ್ ಪ್ರತಿಕ್ರಿಯೆ ನೀಡದಿರುವುದು ಕಾಮಗಾರಿ ವಿಳಂಬಕ್ಕೆ ಕಾರಣವಾಗಲಿದೆ. ಈ ಬಗ್ಗೆ ಬಿಡಿಎ ಆಯುಕ್ತರು ಫೋರಂಗೆ ಮಾಹಿತಿ ನೀಡಿದ್ದಾರೆ.
| ಶ್ಯಾಮ್, ಎನ್ಪಿಕೆಎಲ್ ಓಪನ್ ಫೋರಂ ಸದಸ್ಯ
ಕೃಪೆ:ವಿಜಯವಾಣಿ
