ಮೈಸೂರು, ನವೆಂಬರ್ 21, 2019 (www.justkannada.in): ಭಿನ್ನ ಕಥೆಯ ಚಿತ್ರ ‘ಅಳಿದು ಉಳಿದವರು’ ಟ್ರೈಲರ್ ರಿಲೀಸ್ ಆಗಿದ್ದು, ಯೂ ಟ್ಯೂಬ್ ಹಾಗೂ ಸೋಷಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಸದ್ದು ಮಾಡುತ್ತಿದೆ.
ಟಿವಿ ಶೋವೊಂದರ ತಾಕಲಾಟಗಳನ್ನು ತೆರೆದಿಡುವ ಚಿತ್ರ ‘ಅಳಿದು ಉಳಿದವರು’. ಸಿಂಪಲ್ ಸ್ಟಾರ್ ರಕ್ಷಿತ್ ಶೆಟ್ಟಿ ಫಸ್ಟ್ ಲುಕ್ ಬಿಡುಗಡೆ ಮಾಡಿ ಭರವಸೆ ಮೂಡಿಸಿದ್ದ ಚಿತ್ರವು ಟೀಸರ್ ಮೂಲಕ ಮತ್ತೆ ಸುದ್ದಿಯಾಗಿದೆ.
ಹೊಸ ನಿರ್ದೇಶಕರ ಪ್ರಯತ್ನದ ಚಿತ್ರ ಅಳಿದು ಉಳಿದವರು ಟ್ರೈಲರ್ ಬುಧವಾರ, ನ.20 ರ ಸಂಜೆ ಬಿಡುಗಡೆಯಾಗಿದೆ. ನಿರ್ದೇಶಕ, ನಟ ಪವನ್ ಕುಮಾರ್ ತಮ್ಮ ಅಧಿಕೃತ ಯೂಟ್ಯೂಬ್ ಚಾನೆಲ್ ನಲ್ಲಿ ಚಿತ್ರದ ಟ್ರೈಲರ್ ಅನಾವರಣಗೊಳಿಸಿದ್ದಾರೆ.
ನಿರ್ಮಾಪಕ ಅಶು ಬೆದ್ರ ಮೊದಲ ಬಾರಿಗೆ ನಾಯಕರಾಗಿ ಕಾಣಿಸಿಕೊಂಡಿರುವ ಅಳಿದು ಉಳಿದವರು ಚಿತ್ರವು ಒಂದು ಪ್ರಸಿದ್ಧ ಟಿವಿ ವಾಹಿನಿಯ ಕಾರ್ಯಕ್ರಮದ ಸುತ್ತ ಸುತ್ತುತ್ತದೆ. ಕಾರ್ಯಕ್ರಮದ 100ನೇ ಸಂಚಿಕೆಯನ್ನು ರೂಪಿಸಲು ಎದುರಾಗುವ ತೊಂದರೆಗಳು, ವಾಹಿನಿಯ ಟಿಆರ್ ಪಿಗಾಗಿ ಪಡುವ ಪಾಡು ಇವುಗಳನ್ನೆಲ್ಲ ಭಾವನೆಗಳ ಏರಿಳಿತಗಳೊಂದಿಗೆ ಚಿತ್ರವು ನಿರೂಪಿತವಾಗುತ್ತದೆ.
ಅರವಿಂದ್ ಶಾಸ್ತ್ರಿ ಈ ಚಿತ್ರದ ನಿರ್ದೇಶನ ಮಾಡುತ್ತಿದ್ದು ಚಿತ್ರಕಥೆಯನ್ನೂ ರಚಿಸಿದ್ದಾರೆ. ಅಶು ಬೆದ್ರ ವೆನ್ಚರ್ಸ್ ಮತ್ತು ಪಿವಿಆರ್ ಪಿಕ್ಚರ್ಸ್ ಸಂಸ್ಥೆಗಳು ಚಿತ್ರದ ನಿರ್ಮಾಣದ ಹೊಣೆಯನ್ನು ವಹಿಸಿಕೊಂಡಿವೆ. ಬೆದ್ರ ನಿರ್ಮಾಪಕರಾಗುವ ಜೊತೆಗೆ ಮೊದಲ ಬಾರಿಗೆ ಅಳಿದು ಉಳಿದವರು ಚಿತ್ರದ ನಾಯಕನಾಗಿಯೂ ನಟಿಸಿದ್ದಾರೆ. ಸಂಗೀತ ಭಟ್ ಬೆದ್ರ ಅವರಿಗೆ ಜೋಡಿಯಾಗಿದ್ದಾರೆ. ಬೆದ್ರ ಅವರು ಈ ಹಿಂದೆ ಸಿಂಪಲ್ಲಾಗಿ ಇನ್ನೊಂದು ಲವ್ ಸ್ಟೋರಿ ಚಿತ್ರದ ನಿರ್ಮಾಣ ಮಾಡಿದ್ದರು.
ಹಿರಿಯ ನಟ ಅತುಲ್ ಕುಲಕರ್ಣಿ, ಲೂಸಿಯಾ ಖ್ಯಾತಿಯ ಪವನ್ ಕುಮಾರ್, ಬಿ ಸುರೇಶ್, ಸಂಗೀತಾ ಭಟ್, ಅರವಿಂದ್ ರಾವ್ ಮುಂತಾದವರು ತಾರಾಗಣದಲ್ಲಿದ್ದು ಚಿತ್ರದ ಬಗ್ಗೆ ಕುತೂಹಲ ಹೆಚ್ಚುವಂತೆ ಮಾಡಿದೆ. ಮಿಥುನ್ ಮುಕುಂದ್ ಚಿತ್ರಕ್ಕೆ ಸಂಗೀತ ನೀಡಿದ್ದಾರೆ.
ಅಳಿದು ಉಳಿದವರು ಟ್ರೈಲರ್ ಭಿನ್ನ ಕಥೆಯನ್ನು ತೆರೆದಿಡುವ ಮೂಲಕ ಗಮನ ಸೆಳೆದಿದೆ. ಹೊಸ ನಿರ್ದೇಶಕ ಮತ್ತು ನುರಿತ ಕಲಾವಿದರನ್ನು ಹೊಂದಿರುವ ಚಿತ್ರವು ಮುಂದಿನ ತಿಂಗಳು ಡಿಸೆಂಬರ್ 6 ರಂದು ತೆರೆಗೆ ಲಗ್ಗೆ ಇಡಲಿದೆ.
