ಬೆಂಗಳೂರು, ಜೂ.02, 2020 : (www.justkannada.in news ) : ನಿತ್ಯೋತ್ಸವ ಕವಿ ನಿಸಾರ್ ಅಹಮದ್ ಅವರಿಗೂ ಸಹ ಎಲ್ಲರಿಗೂ ಇರುವಂತೆ ಒಂದು ವೀಕ್ನೆಸ್ ಇತ್ತು. ಅದಕ್ಕಾಗಿ ಅವರು ತುಂಬಾನೆ ಹಾತೊರೆಯುತ್ತಿದ್ದರು. ಆದರೆ ಕುಟುಂಬದವರ ಸಹಕಾರಿಂದ ಆದಷ್ಟು ಬೇಗ ಈ ದೌರ್ಬಲ್ಯದಿಂದ ನಿಸಾರ್ ಹೊರ ಬಂದರು ಅನ್ನೋದು ವಿಶೇಷ.
ನಿಸಾರ್ ಅಹಮದ್ ಅವರಿಗೆ ಇದ್ದ ಆ ದೌರ್ಬಲ್ಯವೇನು..? ಅದರಿಂದ ಅವರೇಗೆ ಹೊರ ಬಂದರು ಅನ್ನುವ ಒಂದು ಇಂಟರೆಸ್ಟಿಂಗ್ ಸಂಗತಿಯನ್ನು ಪತ್ರಕರ್ತ ಎ.ಆರ್.ಮಣಿಕಾಂತ್, ತಮ್ಮ ಫೇಸ್ ಬುಕ್ ಪುಟದಲ್ಲಿ ಹಂಚಿಕೊಂಡಿದ್ದಾರೆ. ಅದು ಹೀಗಿದೆ….
ಸಾರ್, ನಿಮಗೆ ಯಾವುದೇ ಕೆಟ್ಟ ಚಟ ಇರಲಿಲ್ಲವಾ?’-ಅದೊಮ್ಮೆ ಹೀಗೊಂದು ಪ್ರಶ್ನೆ ಕೇಳಿದ್ದೆ. ಅವತ್ತು ನನ್ನ ಜೊತೆಗೆ ಗೆಳೆಯ ಸೀತಾರಾಮ ಮಯ್ಯ ಇದ್ದ.
”ನಂಬುತ್ತಿಯೇನಪ್ಪಾ, ಒಂದು ಕಾಲದಲ್ಲಿ ನಾನು ಚೈನ್ ಸ್ಮೋಕರ್ ಆಗಿದೆ. ಒಂದರಹಿಂದೆ ಒಂದು ಸಿಗರೇಟ್ ಸೇದುತ್ತಾ ಇದ್ದೆ. ಎಷ್ಟು ಸೇದುತ್ತಿದ್ದೆ ಅಂತ ಲೆಕ್ಕ ಇಡ್ತಾ ಇರಲಿಲ್ಲ. ಪ್ರತಿ 15-20ನಿಮಿಷಕ್ಕೆ ಒಮ್ಮೆ ಸಿಗರೇಟ್ ಸೇದುವುದು ಅಭ್ಯಾಸ ಆಗಿಬಿಟ್ಟಿತ್ತು. ಯಾವುದೇ ಚಟ ಆಗಲಿ, ಕಲಿಯೋದು ಸುಲಭಾರೀ, ಅದನ್ನು ಬಿಡುವುದು ಕಷ್ಟ. ನನಗೂ ಹೀಗೇ ಆಯ್ತು. ಸಿಗರೇಟ್ ಬಿಡಬೇಕು ಅಂದುಕೊಂಡೆ. ಸ್ವಲ್ಪ ದಿನ ಬಿಟ್ಟೂಬಿಟ್ಟೆ. ಆದ್ರೆ ಮನಸ್ಸು ಆ ಸಿಗರೇಟ್ ಗಾಗಿ, ಅದರ ವಾಸನೆಗಾಗಿ ಹಾತೊರೆಯುತ್ತಿತ್ತು. ಸಿಗರೇಟ್ ನ ಹೊಗೆ ಕುಡಿದ್ರೆ ಸಾಕು ಅನ್ನಿಸಿಬಿಡ್ತಾ ಇತ್ತು. ಆಗ ನಾನೇನು ಮಾಡ್ತಿದ್ದೆ ಗೊತ್ತ? ಬಸ್ಸ್ಟಾಂಡ್ ಲಿ ಬೀಡಿ-ಸಿಗರೇಟ್ ಸೇದ್ತಾ ಇರ್ತಾರಲ್ಲ; ಅವರ ಪಕ್ಕ ಹೋಗಿ ನಿಲ್ತಾ ಇದ್ದೆ! ಅವರು ಹೋಗೆ ಬಿಟ್ಟಾಗ, ಜೋರಾಗಿ ಉಸಿರು ಎಳೆದುಕೊಳ್ತಾ ಇದ್ದೆ. ಹಾಗೆ ಮಾಡಿದ್ರೆ ಏನೋ ಸಮಾಧಾನ ಆಗ್ತಿತ್ತು. ಕೆಲವೊಮ್ಮೆ ಕ್ಲಾಸ್ ಮುಗಿಸಿ ಚೇಂಬರ್ ಗೆ ಬಂದ ತಕ್ಷಣ, ಸಿಗರೇಟ್ ಸೇದಬೇಕು ಅನ್ನಿಸ್ತಿತ್ತು. ಆ ಹೊಗೆಯನ್ನು ಕುಡಿಯಲಿಲ್ಲ ಅಂದ್ರೆ ವಿಪರೀತ ತಲೆನೋವು, ತಲೆಸುತ್ತು ಬಂದುಬಿಡ್ತಾ ಇತ್ತು. ವಿಪರೀತ ಚಡಪಡಿಕೆ ಆಗ್ತಾ ಇತ್ತು.
ಆಗ ನಾನೇನು ಮಾಡ್ತಿದ್ದೆ ಗೊತ್ತಾ? ಚೇಂಬರ್ ನಿಂದ ಹೊರಗೆ ಬಂದು, ಗೇಟ್ ಹತ್ರ ಸಿಗರೇಟ್ ಸೇದುತ್ತಾ ನಿಂತಿರುವ ಸ್ಟೂಡೆಂಟ್ಸ್ ನ ಗಮನಿಸ್ತಾ ಇದ್ದೆ. ನಂತರ, ಅಟೆಂಡರ್ ಮೂಲಕ ಆ ಹುಡುಗರನ್ನು ಚೇಂಬರ್ ಗೆ ಕರೆಸಿ, ‘ಈಗ ನನ್ನ ಎದುರು ನೀವು ಸಿಗರೇಟ್ ಸೇದಬೇಕು’ ಅನ್ನುತ್ತಿದ್ದೆ. ಪಾಪ, ಆ ಹುಡುಗರು ಭಯದಿಂದ, ಸಾರ್, ತಪ್ಪಾಯ್ತು ಸರ್, ನಾಳೆಯಿಂದ ಸೇದಲ್ಲ ಸಾರ್ ಅಂತಿದ್ರು. ನಾನು- ‘ಇಲ್ಲಾರೀ, ನಿಮ್ಮ ವಿರುದ್ಧ ಏನೂ ಆಕ್ಷನ್ ತಗೋಳಲ್ಲ ನಾನು. ಈಗ ಸಿಗರೇಟ್ ಸೇದಿ’ ಅನ್ನುತ್ತಿದ್ದೆ. ಆ ಹುಡುಗರು, ವಿಧಿ ಇಲ್ಲದೆ ಸೇದುತ್ತಿದ್ದರು. ನಾನು ಸಂತೋಷದಿಂದ ಆ ಹೊಗೆಯನ್ನು ಸೇವಿಸಿ ರಿಲ್ಯಾಕ್ಸ್ ಆಗುತ್ತಿದ್ದೆ.
ಹೀಗೇ ಬಿಟ್ಟರೆ ಏನಾದರೂ ಅನಾಹುತ ಆಗಬಹುದು ಅನ್ನಿಸಿದಾಗ, ನಮ್ಮ ಮನೆಮಂದಿ ಒಂದು ಉಪಾಯ ಮಾಡಿದರು. ಅದೊಂದು ರಾತ್ರಿ ಇದ್ದಕ್ಕಿದ್ದಂತೆ ಬಳ್ಳಾರಿಗೆ ಕರೆದೊಯ್ದು ಅಲ್ಲಿ ನಾಟಿ ಔಷಧಿ ಕೊಡಿಸಿದರು. ನನಗೆ ಚಿಕಿತ್ಸೆ ನೀಡಿದವರು – ನೋಡಿ ಸಾರ್, ನೀವೇನಾದ್ರೂ ಮತ್ತೊಮ್ಮೆ ಸಿಗರೇಟ್ ಸೇದಿದರೆ, ಬಾಯಲ್ಲಿ ರಕ್ತ ಬರುತ್ತೆ. ಆಮೇಲೆ ಸತ್ತುಹೋಗ್ತೀರ ಅಷ್ಟೇ…’ ಅಂದರು.
ಅವತ್ತಿಂದ ನಾನು ಸಿಗರೇಟ್ ಸೇದುವುದನ್ನು ಸಂಪೂರ್ಣವಾಗಿ ಬಿಟ್ಟೆ…
ooo
key words : prof. k s nissar ahmed- nityotsava-Kannada-poet-smoking-weakness
